Mar 12 | HauSRK | STEP | Saʼan nan ya fara yi musu magana da misalai, ya ce, “Wani mutum ya shuka gonar inabi. Ya kewaye ta da katanga, ya haƙa rami domin matsen inabin, ya kuma gina ɗakin gadi. Sai ya ba wa waɗansu manoma hayar gonar inabin, saʼan nan ya yi tafiya.

Mark 12

Misali na ʼYan Haya

1 Saʼan nan ya fara yi musu magana da misalai, ya ce, “Wani mutum ya shuka gonar inabi. Ya kewaye ta da katanga, ya haƙa rami domin matsen inabin, ya kuma gina ɗakin gadi. Sai ya ba wa waɗansu manoma hayar gonar inabin, saʼan nan ya yi tafiya. 2 Da lokacin girbi ya yi, sai ya aiki wani bawa wajen ʼyan hayan, don yǎ karɓo masa ʼyaʼyan inabin daga wurinsu. 3 Amma suka kama shi, suka yi masa dūka, suka kore shi hannun wofi. 4 Sai ya sāke aikan wani bawa wurinsu, amma suka bugi wannan mutum a kai, suka wulaƙanta shi. 5 Har yanzu ya sāke aikan wani. Wannan kuwa suka kashe. Ya aika waɗansu da yawa; suka bubbuge waɗansu, sauran kuwa suka kashe.

6 “Sauran mutum ɗaya da ya rage ya aika, ɗa, da yake ƙauna. Daga ƙarshe sai ya aike shi, yana cewa, ‘Za su girmama ɗana.’

7 “Amma ʼyan hayan suka ce wa juna, Aha! ‘Wannan shi ne magājin. Ku zo mu kashe shi, gādon kuma yǎ zama namu.’ 8 Sai suka kama shi suka kashe, suka jefa shi bayan gonar inabin.

9 “To, me, mai gonar inabin zai yi ke nan? Zai zo yǎ karkashe dukan ʼyan hayan nan, ya kuma ba wa waɗansu gonar inabin. 10 Ba ku taɓa karanta wannan Nassi ba:

“ ‘Dutsen da magina suka ƙi,
shi ne kuwa ya zama dutsen kusurwan gini.
11 Ubangiji ya yi wannan,
ya kuma yi kyau a idanunmu’ ^{▼▼Zab 118.22, 23}?”

12 Sai suka nemi hanyar da za su kama shi, domin sun gane ya yi misalin a kansu ne. Amma suka ji tsoron taron, sai suka bar shi suka yi tafiyarsu.

Biyan Haraji ga Kaisar

13 Daga baya, sai suka tura waɗansu Farisiyawa da mutanen Hirudus zuwa wurin Yesu, domin su sa masa tarko a cikin maganarsa. 14 Suka zo wurinsa suka ce, “Malam, mun san kai mutum ne mai mutunci. Ba ka bin raʼayin mutane, don ba ka nuna bambanci. Amma kana koyar da hanyar Allah bisa ga gaskiya. Daidai ne a biya wa Kaisar haraji, ko babu? 15 Mu biya ko kada mu biya?”

Amma Yesu ya san munafuncinsu, sai ya yi tambaya, ya ce, “Don me kuke ƙoƙarin sa mini tarko? Ku kawo mini dinari in ga.” 16 Suka kawo masa kuɗin, sai ya tambaye, su ya ce, “Hoton wane ne wannan? Kuma rubutun wane ne wannan?”

Suka ce, “Na Kaisar.”

17 Sai Yesu ya ce musu, “Ku ba wa Kaisar abin da yake na Kaisar, ku ba wa Allah kuma abin da yake na Allah.”

Suka yi mamakinsa ƙwarai.

Aure a Tashin Matattu

18 Saʼan nan Sadukiyawa da suke cewa, babu tashin matattu, suka zo masa da tambaya. 19 Suka ce, “Malam, Musa ya rubuta mana cewa, in ɗanʼuwan wani mutum ya mutu, ya bar mata babu ʼyaʼya, dole mutumin ya auri gwauruwar, yǎ kuma samo wa ɗanʼuwansa ʼyaʼya. 20 To, an yi waɗansu ʼyanʼuwa guda bakwai. Na fari ya yi aure, ya mutu babu ʼyaʼya. 21 Na biyun ya auri gwauruwar, sai shi ma ya mutu, babu ʼyaʼya. Haka kuma na ukun. 22 A gaskiya, ba ko ɗaya daga cikin bakwai ɗin da ya bar ʼyaʼya. Daga ƙarshe, macen ta mutu. 23 To, a tashin matattu, matar wa za ta zama, don duk su bakwai nan sun aure ta?”

24 Yesu ya ce, “Ashe, ba a cikin kuskure kuke ba saboda rashin sanin Nassi, ko ikon Allah? 25 Saʼad da matattu suka tashi, ba za su yi aure ba, ba kuwa za a ba da su ga aure ba. Za su zama kamar yadda malaʼiku suke a cikin sama. 26 Game da tashin matattu kuwa-ashe, ba ku karanta a cikin littafin Musa ba, game da labarin ɗan kurmin nan mai cin wuta da Musa ya gani a jeji, yadda Allah ya yi magana da shi, ya ce, ‘Ni ne Allah na Ibrahim, Allah na Ishaku da kuma Allah na Yaƙub’ ^{▼▼Fit 3.6}? 27 Shi ba Allah na matattu ba ne, sai dai na masu rai. Kun yi mummunan kuskure!”

Dokar da Ta fi Girma Duka

28 Wani daga cikin malaman dokoki ya zo ya ji suna muhawwara. Da ya lura cewa Yesu ya amsa musu daidai, sai ya tambaye shi, ya ce, “A cikin dukan dokoki, wacce ta fi girma duka?”

29 Yesu ya ce, “Wadda ta fi girma duka, ita ce wannan: ‘Ya ku Israʼila, ku saurara, Ubangiji Allahnmu, Ubangiji ɗaya ne. 30 Ka ƙaunaci Ubangiji Allahnka da dukan zuciyarka, da dukan ranka, da dukan hankalinka, da kuma dukan ƙarfinka.’ ^{▼▼M Sh 6.4, 5} 31 Na biyun ita ce, ‘Ka ƙaunaci maƙwabcinka kamar kanka.’ ^{▼▼L Fir 19.18} Ba wata doka da ta fi waɗannan.”

32 Mutumin ya ce, “Malam, ka faɗi daidai. Daidai ne da ka ce, Allah ɗaya ne, babu kuma wani sai shi. 33 Nuna ƙauna ga Allah da dukan zuciyarka, da dukan ganewarka, da dukan ƙarfinka, da kuma nuna ƙauna ga maƙwabcinka kamar kanka, ya fi dukan hadayun ƙonawa da sadakoki.”

34 Da Yesu ya ga ya amsa da hikima, sai ya ce masa, “Ba ka da nisa da mulkin Allah.” Daga lokacin, ba wanda ya yi karambani yin masa wata tambaya.

Kiristi Ɗan Wane ne?

35 Yayinda Yesu yake koyarwa a filin haikalin, sai ya yi tambaya, ya ce, “Yaya malaman dokoki suke cewa Kiristi ɗan Dawuda ne? 36 Dawuda da kansa ya yi magana ta wurin Ruhu Mai Tsarki, ya ce,

“ ‘Ubangiji ya ce wa Ubangijina:
“Zauna a hannun damana,
sai na sa abokan gābanka
a ƙarƙashin sawunka.” ’ ^{▼▼Zab 110.1}
37 Dawuda da kansa ya kira shi ‘Ubangiji.’ To, ta yaya kuwa zai zama ɗansa?”

Taro mai yawa suka saurare shi da murna.

38 Saʼad da Yesu yake koyarwa, ya ce, “Ku lura da malaman dokoki. Sukan so yin tafiya a manyan riguna, a kuma dinga gaishe su a wuraren kasuwanci. 39 Sukan kuma nemi wuraren zama mafi daraja a majamiʼu, da kuma wuraren zaman manya a bukukuwa. 40 Suna ƙwace gidajen gwauraye, kuma don nuna iyawa, sukan yi dogayen adduʼoʼi. Irin mutanen nan, za su sha hukunci mai tsanani sosai.”

Bayarwar Gwauruwa

41 Yesu ya zauna ɗaura da inda ake bayarwa, ya kuma dubi yadda taron suke sa kuɗinsu a cikin baitulmalin haikali. Masu arziki da yawa suka zuba kuɗaɗe masu yawa. 42 Amma wata matalauciya gwauruwa, ta zo ta saka anini biyu, da suka yi daidai da rabin kobo.

43 Yesu ya kira almajiransa wurinsa, ya ce, “Gaskiya nake gaya muku, abin da matalauciya gwauruwan nan ta zuba cikin baitulmalin nan ya fi na sauran dukan. 44 Dukansu sun bayar ne daga cikin arzikinsu; ita kuwa, daga cikin talaucinta, ta ba kome-duk abin da take da shi na rayuwa.”